Lewati ke isi

Konfesi HKBP (1951) (Bahasa Batak)

Nama lengkap: Panindangion Harporseaon ni HKBP Tahun 1951

Panindangion Harporseaon
Huria Kristen Batak Protestan (HKBP)
Tahun 1951

Pinaruar ni Kantor Pusat HKBP

Percetakan HKBP Jl. Jend. A. Yani 63 P. Siantar

Hata Patujulo

Mansai ringkot do buku: "Panindangion Haporseaon", laho pahothon haporseaonta dohot mangalo parpoda haliluon. Adong do di huria najolo Panindangion-Haporseaon Oikumene mangalo angka poda haliluon. Adong do angka surat panindangion di tingki Reformasi mangalo poda ni Katholik-Rom. Songon i ma mandatdati ganup hali mullop poda haliluon na manggaori huria, sai tubu do angka surat Panindangion na imbaru. Alai di angka Panindangion na imbaru i, ndang dihalupahon Panindangion na parjolo i laho mangalo haliluon na imbaru i. Asa ingkon tongtong do mar-Panindangion na imbaru huria i laho mangalo angka poda haliluon na tubu. Songon angka Sipatota Huria di tingki Reformasi, ndada holan panindangion najolo dipangke nasida, ala asin do rumang ni i muse di tingki nasida. Asa ndang jadi nok mata ni huria marhanalomhon panindangion najolo. Ingkon sai pinarata manang pinatota do angka panindangion i di ganup tingki.

Di tano Jerman masa do angka poda haliluon na imbaru olat ni taon 1933. Di tingki tarsunggul do angka huria na disi, manghilala- na so sae be panindangion najolo mangalo haliluon i, jadi dipauli nasida do sada panindangion na imbaru, na margoar: "Die Barmer Thesen".1. Diondolhon nasida do Panggomgomon ni Kristus sandiri; dialo do panggomgomion ni jolma di parugamaon songon si Hitler dohot angka donganna.

Di tano Bolanda pe marusaha do nasida laho paturehon sada panindangion na imbaru. Ia panindangion na imbaru i tong do marojahan tu panindangion najolo, alai marsoara na imbaru di tingki na modern on.2

Marbingkas sian angka na manosak Hurianta, ingkon tubu ma di tingki on pamingkirion maradophon angka ugama dohot podapoda na humaliang hita. Ia nasailaon, holan dua do na tardok ugama na manghaliangi hita, i ma Hasipelebeguon dohot Hasilomon. Alai anggo nuaeng, nunga tung torop na ro sian duru dohot na martubuan di bagasan.

Tagoari ma jolo sadasada:

  1. Katholiek Rom. Na mangulahi ro nuaeng laho paherbanghon habongna. Na maralo do podanta tu pangajarannasida.
  2. Adventist. Na pajongjonghon Seminarium di Pematangsiantar dohot na pararathon podanasida marhite na pararathon angka bukunasida dohot marsaranan manang pigapiga borngin di sada luat.
  3. Pinkster. Nunga hira di ganup luat ni hita on rarat podanasida; diondolhon nasida do taringot tu tondi dohot na marhata na leban. Lelengleleng nasida martangiang dohot marende Halleluyah. Ruar do sada surat kabar nasida sian Jakarta na margoar "Penyuluh".
  4. Na tonditondion. Ragam do nuaeng na tonditondion di hita on, adong na manggoari dirina "Huria na badia", adong "Huria Panghophopon", adong na marsubanghon mudar songon na di Pagar Sinondi dohot Pematangsiantar, adong do na mangihuthon Sibindanamora, na di Sionomhudon dohot Laeparira. Na marojahan tu Bibel do didok podanasida, alai tung na sala situtu do pangalapathonna di hata i; tung tubutubu ni rohana do dibahen.
  5. Sirajabatak. On pe tung rarat do di torop luat. Na marrumang partei manang golongan do nasida didok. Alai tung tangkas do tarida di anggaran dasarnasida angka ruhutruhut ni hasipebeleguon najolo siradotannasida.
  6. Punguan ni par-Bibelkring. I ma parpunguan na ro sian Balata jala na mangararati tu Pematangsiantar. Songon burbur do i di huria, angka na manegai roha ni dongan. Diondolhon nasida do naung godang sala ni pangulaon ni Hurianta, na so domu tu Bibel i. Nunga taripar i dohot tu Tapanuli on.
  7. Hakristenon Nationalisme. I ma na marbuung salpu i. Dipalipe nasida do poda ha-Kristenon i ma mangaithon tu tujuan ni roha haBangsoon.
  8. Synkretisme. Angka na mandok: "Rap denggan do sude ugama i, holan na marsisurungi saotik do". Nunga tubu sada ugamo di Jakarta, na margoar: Ugama "ISLAM ISA". I ma pardomuan ni haSilomon, ha-Kristenon dohot ha-Jahudion. Sai ditongosi nasida do hatorangan ni podanasida i nang tu hita on. Songon on do panimbangionnasida taringot tu angka ugama: Ugamanasida i ma apala parginjang 24 karat mas mamolin, ninna. Kristen: 22 karat, ugamo tinggi – Jahudi: 20 karat = ugama menengah tinggi, Silom: 18 karat = ugama menengah. Sude ugama na asing: 16 karat = ugama rendah.
  9. Angka podapoda na ro sian Theosophie, Komunisme, Kapitalisme. Tung godang do ro angka hata sian i na tau manggaori haporseaon.
  10. Angkup ni i nunga jongjong punguan ni angka na mamulik sian hurianta, i ma songon Mission Batak, H.Ch.B.P.K.B. dohot H.K.I., jala binoto do sai na tubu dope muse tamba ni i manang piga nari jala tagamon do sia na adong do muse asing ni podana sian poda ni Hurianta.
  11. Ha-Sipelebeguon dohot ha-Silomon na humaliang hita. Tung na manimbil do podanasida sian Bibel i; jala apala pajorbuthon, ala marrupa na asing i nasida ro mandapothon Hurianta. Tung bagas dope marurat pasipasi ni ha-Sipebeleguon i di roha ni torop ruas ni Hurianta, songon urat ni haubolon na manorusi tano hatubuanna.
  12. Sada nari dope apala na ringkot: Ingkon tontu do panindangionta maradophon Adat dohot Kebudayaan ni bangsonta. Apala taringot tuson ma ingkon gumodang pingkiranta asa unang pansegai na dua i tu haporseaon. Sai diondolhon bangsonta do di tingki on: Ingkon hot Adat dohot Kebudayaanta. Na denggan do i alai nang pe denggan tadok ndang sude i mardomu tu haporseaonta, adong do parmaraan disi. Tung parmaraan do di Hurianta angka ugamo dohot podapoda na marragam i. Ala ni sude na pinajojor ondeng, dipangido tingki on do nuaeng tu hita: Ingkon adong do di Hurianta "PANINDANGION HAPORSEAON" na marisi poda na polin hombar tu na tahatindanghon sian mulana. I ma na gabe tanda dohot haojahan di hita.

Angkup ni i ringkot do adong di hurianta "Panindangion Haporseaon" i, na manghamham saluhut ojahan ni na tahaporseai, asa unang samak tu angka na asing. Ai i do antong aturanna di sada punguan Kristen na margoar "Huria". Ndang goaron "Huria" sada punguan Kristen, ia so adong Panindangionna. Jadi ringkot situtu do i bukuhononhon asa lam torang pangantusion ni sude ruas ni Hurianta dalan pahothon haporseaonna.

Jadi on ma pangarimpunan ni ringkotna i:

  1. Ala haporseaon i do manghorhon panindangion on songon na nidok ni Apostel Paulus tu halak Korint: "Na porsea do ahu umbahen na huhatahon".3
  2. Ala ingkon manindangi do Huria maralohon portibi on, songon na nidok ni Apostel Petrus: "Tongtong ma hamu hobas, mangalusi ganup na manungkun hamu taringot tu na hinirim ni rohamuna"4
  3. Ala sipanorangi do i, na patandahon poda na sintong sian poda haliluon.5
  4. Ala diigil hasadaon di bagasan ngolu parhuriaon do hasadaon di Panindangion-Haporseaon.6
  5. Ala arga situtu do i muse teanon ni na pinompar ni Huria i, laho mangihutihut haporseaon ni angka ompuna.7.

Huasona

Ianggo tung apala na marhuaso, holan Buku Na badia i do, ala Debata do mangula manang pajadihon i. Alai buku Panindangion-Haporseaon i pe marhuaso do. Tutu jolma patomutomu i, alai na marondolan situtu do i tu hata ni Debata.8

Alai unang ma di bagasan paksa haunduhon i, jala unang ma pinamate panggora ni roha. Ingkon bebas do halak manangkasi buku Panindangion i. Molo adong dapotsa disi na so mardomu tu Hata na badia i, boi do pasahatonna haboratanna tu na manguluhon Huria i. Songon na tarsurat di buku on ma Panindangion Haporseaon i, na pinahot ni Synode Godang di Sipoholon, di ari 28-30 Nopember 1951.

  1. Ia panindangion-Haporseaon ni HKBP on, i ma udut ni angka Panindangion-Haporseaon (Confessie) naung adong hian, i ma angka Panindangion-Haporseaon (Confessie) sitolutolu na hinatindanghon ni angka Ama ni Huria najolo na ginoaran :

    -Panindangion Apostolicum -Panindangion Nicenum -Panindangion Atanasianum

  2. Ia Panindangion-Haporseaon on, i ma pangarimpunan ni na itahaporseai dohot na itahirimi di hangoluan on dohot tu hangoluan sogot.

  3. Ia Panindangion-Haporseaon on, i ma ojahan di H.K.B.P. sijamitahononhon dohot sipodahononhon dohot sihangoluhononhon.9

  4. Ia Panindangion-Haporseon on, i ma ojahan di H.K.B.P., laho manulak, mangalo nasa poda na lipe dohot poda haliluon na so hombar tu hata ni Debata.

Bindu 1: Taringot tu Debata

Tahaporseai jala tahatindanghon do:

Sada do Debata na so marmula na so marujung, Pargogo na so hatudosan, Na so olo kuba, Haposan, Parbinoto na sun, Na so hadodoan, Paruhum na tigor, Parasi roha godang, Pardengganbasa. Ibana do manggohi langit dohot tano, Parroha na sintong, Na sun badia, Parholong roha.10

Marhitehite poda on tatulak jala taalo do hasomalan na mandok: "Ompung" tu Debata dohot panghilalaan na mangarajumi holan Pardenggan basa do Debata dohot roha na manghaposi boi ro pasupasu sian "sumangot ni Ompu" songon na hinasomalhon ni halak Sipelebegu. Suang songon i na manjujur ari, na parundinghon langka dohot na manjaha surat ni tangan. Laos marhite poda on tatulak do poda na mangarajumi lumobi Huaso ni Debata sian Ha-BadiaonNa dohot Holong ni rohaNa.

Bindu 2: Hasitolusadaon ni Debata

Tahaporseai jala tahatindanghon do:

Sada do Debatanta jala huhut sitolusada do, i ma: Debata Ama, Debata Anak, Debata Tondi Parbadia.11

Na ditubuhon Ama i do AnakNa sian hadirionNa sandiri sian mula ni mulana ro di saleleng ni lelengna, mandok: Suang songon Ama i na so marmula na so marujung, suang songon i do Anak i. Suang songon i muse do na so marmula jala na so marujung do Tondi Parbadia i, i ma na borhat sian Debata dohot Anak i.12

Marhitehite poda on, taalo jala tatulak do pangantusion na mandok: Holan sada do Debata (Maha Esa) di bagasan pangantusion na mangarajumi: Na tumoru do Anak i dohot Tondi i sian Ama i.

Taalo do huhut poda na mandok: Ia Hadirion ni Sitolusada, i ma: Debata Ama, AnakNa Tuhan Jesus Kristus dohot Ina Tondi Parbadia.

Bindu 3: Angka Ulaon Hapunjungan ni Debata Sitolusada I

  1. Debata Ama do na manompa, marmudumuduhon dohot manggomgomi saluhut na tarida dohot na so tarida Marhitehite poda on tatulak jala taalo do poda Patalismus (Takdir, sibaran dohot bagian).

  2. Debata Anak, na gabe jolma, na tinubuhon ni si Maria, na so habubuhan, na gabegabean sian Tondi Parbadia, na ginoar Tuhan Jesus. Asa gabe dua pangalaho jumpang di Ibana, i ma: Ha-Debataon dohot ha-Jolmaon di bagasan sada diri, na so boi sirangon. Debata situtu do Kristus, alai huhut jolma situtu. Na tumaon na porsuk do Ibana di panguhuman ni si Latus na mate tarpajal di hau pinarsilang, laho paluahon hita sian dosa dohot sian hamatean dohot sian gomgoman ni sibolis i. Na gabe hagogok ni pelean do Ibana bahen pardengganan tu Debata siala sude dosa ni hajolmaon. Na tuat do Ibana tu banuatoru, dung ditanom, na mulak mangolu di ari patoluhon, na manaek tu surgo, laho hundul tu siamun ni Debata Jahowa, Amanta i na marhasangapon salelenglelengna. Di banua ginjang do Ibana mangondihon hita, manggomgomi saluhut, paima mulak sogot tu tano on manguhumi halak na mangolu dohot na mate.13 Mat. 28:18; Ep. 1: 20-22; Ep. 1:7; Joh. 3:16; Heb. 9: 14; Pilippi 2:9-11. Marhitehite poda on, tatulak jala taalo do: Angka poda ni Katholik rom,

    1. Na mandok: "Na boi do si Maria, ina ni Tuhan Jesus manang na ginoarannasida na badia, manangianghon hita tu Debata".
    2. Poda ni Katholik Rom na mamodahon: "Boi do Pastoor mamelehon Kristus di pelean Misa".
    3. Poda haliluon ni Katholik Rom na mandok: Paus na di huta Rom do wakil ni Kristus na di tano on.14
    4. Marhite poda on nialo jala tinulak do pingkiran ni jolma na padoshon Tuhan Jesus dohot Nabi-nabi na adong di portibi on.

  3. Debata Tondi Parbadia do na manjou mangajari huria i jala patongtonghon di bagasan haporseaon dohot habadiaon di bagasan Barita Nauli bahen hasangapon ni Debata.15

Marhitehite poda on taalo jala tatulak do poda na mandok "Boi do songgop Tondi Parbadia tu jolma marhitehite panghobasionnasida sandiri so pola marhitehite sian Barita Nauli". Laos songon i taalo jala tatulak do poda na mandok: "Holan marhitehite na siarsiaran dohot na marhata sileban o songgop Tondi Parbadia".

Laos songon i tatulak jala taalo poda na mandok: Na so pola ringkot marubat, sae do molo holan martangiang tu Tondi Parbadia. Jala na mambahen Panurirangion gapgap mangasahon Tondi Parbadia. Laos songon i parsaoran na masaltuhu, na matorbanghu, ala naung digohi Tondi Parbadia, ninna. Sudena na taalo jala na tatulak on, i ma angka: Poda na: Mangasahon Goar ni Tondi Parbadia di na so ture dalanna.

Bindu 4: Hata ni Debata

Tahaporseai jala tahatindanghon do:

Ia hata na tarsurat di Bibel i, i ma di Padan Narobi dohot Padan Na imbaru TUNG HATA NI DEBATA DO I. "Ai ndang dung ian tahi ni jolma haroroan ni panurirangon, alai tinogihon ni Tondi Parbadia do umbahen na marsoara angka jolma disuru Debata".16

Ai nasa surat i, sinihathon ni Debata do, jala hasea mamodai, maminsang, pauliulihon, manogunogu di bagasan hatigoran, asa rimpas hata ni Debata, hobas tu nasa ulaon na denggan.48

Marhitehite on taondolhon do: Naung singkop do Surat Na Badia i papatarhon hadirion ni Debata dohot lomo ni rohaNa jala nunga singkop dipodahon di Surat Na Badia i sihaporseaan ni jolma parhitean tu hangoluan na saleleng ni lelengna.17

Holan Surat Na Badia i do parmulaan dohot hapatean ni sude pamingkirion, parbinotoan dohot pangulaon di bagasan huria i dohot di diri na porsea i.

Marhitehite poda on taalo jala tatulak do: Nasa hapistaran dohot habisuhon ni jolma na manimbil sian Hata ni Debata.18

Bindu 5: Mula ni Dosa

Sibolis do mula ni dosa, jala diparsinta rohana do, asa sude jolma gabe pardosa na marbalik sian Debata.19

Asa nang pe denggan jolma na parjolo i (Adam dohot Hawa) na boi mangulahon na hombar tu lomo ni roha ni Debata, na dilaosi do patik na nilehon ni Debata tu nasida hinorhon ni pangelaela ni sibolis i gabe marbalik sian Debata. Pangalaosion do dosa i.20

Bindu 6: Dosa na Tinean

Tahaporseai jala tahatindanghon do:

Dung madabu si Adam dohot si Hawa tu bagasan dosa, taripar do dosa i tu sude pinomparna. Laos ala ni i ma umbahen tubu di bagasan dosa nasa jolma manisia, jala diparhatoban dosa do sude jolma laho mangalaosi patik ni Debata. Dihorhon dosa i do uhum dohot hamatean salelenglelengna.21

Marhitehite poda on, taalo jala tatulak do pingkiran na mandok: Ndang mardosa dope posoposo na tubu tu hasiangan on. Songon i muse pingkiran na lipe sian hata ni Debata na mandok: Holan na nionjar ni hapogoson, hahurangan manang pardangolan do umbahen mangulahon dosa jolma jala na so pola mangarajumi dosa.

Laos songon i poda na mandok: Na songon harotas na ias na so marsurat dope roha ni jolma di hatutubuna.

Bindu 7: Haluaon sian Dosa

Tahaporseai jala tahatindanghon do:

"Na so dapot haluaon sian dosa marhitehite ulaon na denggan, manang marhite sian gogo sandiri. Holan sian asi ni roha ni Debata do marhitehite panobusion ni Jesus Kristus. Ia dalan manjalo i, i ma marhite sian haporseaon na niula ni Tondi Parbadia, asa diauhon hasesaan ni dosa na pinarade ni Jesus Kristus marhite hamamateNa i. Haporseaon sisongon on do dirajumi Debata na gabe hapintoran di joloNa. 22

Bindu 8: Huria

A.

Tahaporseai jala tahatindanghon do:

Ia Huria, i ma parpunguan ni angka na porsea di Jesus Kristus, na jinou, na pinapungupungu, na pinorbadiaan jala na pinatongtong ni Debata marhitehite Tondi Parbadia.23

Marhitehite poda on taalo jala tinulak do:

  1. Huria (sada punguan) na pinajongjong ni jolma sian lomona sandiri; i ma na papulik dirina sian Hurianta, so ala ni naung masa di Hurianta poda na maralo tu Hata ni Debata.

  2. Pingkiran na mandok: Holan huaso ni angka partogi, angka rapotrapot dohot hak ni ruas na manggomgomi huria; ai holan Kristus do na marhuaso di huria jala holan aturan na hombar tu hataNa do situruton. Ndang Demokrasi na mangarajai huria, alai "Kristokrasi" do.

  3. Pingkiran na mandok: Asa "Huria Negara" Hurianta on. Ai asing do kewajiban ni Negara sian tohonan ni Huria.

  4. Pingkiran na mandok: Punguan na marondolan dohot na tarihot tu paradaton do Huria i dohot pingkiran na lipe na manghirim ngolu ni Huria ala ni Organisasi sambing.

B.

Tahaporseai jala tahatindanghon do:

Na badia do huria i. Ia umbahen digoar Huria i na badia, ndada ala ni habadiaon ni angka ruasna sandiri, alai ala habadiaon ni Kristus, Ulu i do. Asa na gabe na badia do Huria i ala ni na pinarbadiaan ni Kristus, jala na dirajumi Debata do nasida angka na badia. Ala habadiaon ni Huria i do umbahen margoar i Bangso na badia, Joro ni Tondi Parbadia, dohot Bagas ni Debata. 24

Marhitehite poda on taalo jala tatulak do poda na mandok: Marhitehite ulaonna sandiri dapotsa habadiaon, songon i pandelean dohot parsirangon ala adong dope diida sian ruas ni Huria i na mangulahon dosa.

C.

Tahaporseai jalatahatindanghon do:

Hatopan do Huria i. Ia Huria Hatopan, i ma punguan ni sude angka na badia, angka naung partohap di Tuhanta Jesus Kristus dohot di silehonlehonna, i ma: Baritanauli, Tondi Parbadia, Haporseaon, Haholongon dohot Panghirimon. I ma na sian ganup luat manang bango, marga, houm, dohot parhataan nang pe marasingasing ceremonie dohot ruhutruhutna pe.25

Marhitehite poda on taalo jala tatulak do: Pangantusion na mangarajumi Huria i songon ugamo parbangsoon dohot na mamingkir na so adong pardomuan ni Huria na sada on tu Huria na sada an.

D.

Tahaporseai jala tahatindanghon do:

Adong sada Huria, Marojahan do i tu Epesus 4,4; 1 Korintus 12:20. "Ai sada do Daging i, i ma Huria i. Alai nang pe torop angka ruas i, sada do daging i". Ia hasadaon ni Huria na nidokna disi asing do i sian hasadaon portibi on na somal na nidok ni halak, ai hasadaon partondion do i.26

Marhitehite poda on, taalo jala tatulak do: Nasa parsirangan na so marojahan tu poda haporseaon; alai holan na marojahan tu ruhutruhut parduru sambing.

E. Tanda ni Huria na Sintong

Tahaporseai jala tahatindanghon do: Ia partinandaan ni huria na sintong, i ma:

  1. Molo polin dipodahon Barita Nauli.
  2. Molo sintong diulahon Sacrament na dua i songon na niaturhon ni Tuhan Jesus.
  3. Ia dipamasa ruhut paminsangon mangotapi angka dosa.

Bindu 9: Parhalado ni Huria

Tahaporseai jala tahatindanghon do:

Sude do halak Kristen tarjou gabe sitindangi ni Kristus jala laho mangaradoti angka ulaon di tongatonga ni huria i, dijou Debata do marhitehite huria i, angka parhalado hombar tu ulaon tohonan ni Kristus na tolu i. Panurirang, Malim, Raja, i ma siradotan di bagasan Huria. I Kor. 12:28.

Tohonan parhaladoon, i ma :

  1. Manjamitahon Baritanauli tu ruas ni Huria i dohot na so ruas dope.
  2. Mangaradoti Ulaon Sacrament na dua i, i ma Pandidion na badia dohot Parpadanan na badia.
  3. Marmahani tondi ni ruas ni Huria (Seelsorge).
  4. Mangaradoti poda na polin, marhitehite paminsangon partondion huhut mangalo parpoda haliluon.
  5. Padalanhon ulaon asi ni roha (Diakonie).

Tu angka ulaon i ma dipabangkit di bagasan Huria i, Apostel, Panurirang, Evangelist, Parmahan dohot Pangajari.28

Marhitehite poda on taalo jala tatulak do: Pingkiran ni halak na manulak dohot mansoadahon tohonan ni partohonan ala ni angka timbangtimbangan ni rohana, so ala ni na diulahon na maralo tu tohonanna.

Marhitehite on taalo jala tatulak do: Manang ise na jongjong di punguan ni Huria i, na marjamita, na mangajari dohot na mangaradoti ulaon Sacrament molo so jolo diampehon Huria tu ibana tohonan parhaladoon di Huria.

Bindu 10: Ulaon na Badia (Sacrament)

Tahaporseai jala tahatindanghon do:

Holan dua do Sacrament na pinatikhon ni Tuhan Jesus siradotanta, i ma Pandidion na badia dohot Parpadanan na badia. I ma na niaturhon ni Tuhan Jesus tu HuriaNa laho pasahathon marhite tanda na tarida asi ni rohaNa na so tarida i, i ma hasesaan ni dosa, haluaon, hangoluan dohot hasonangan, na niauhon marhite haporseaon.29

Marhitehite poda on, taalo jala tatulak do: poda ni Katholik Rom na mandok 7 Sacrament.

A. Pandidion na Badia

Tahaporseai jala tahatindanghon do:

Ia Pandidion Na badia i, parhitean ni si ni roha ni Debata do i tu jolma, ai marhitehite Pandidion i sahat do tu na porsea i hasesaan ni dosa, hatutubu paduahalihon, haluaon sian hamatean dohot sian sibolis jala dapotan hasonangan na salelenglelengna.

Marhite poa on tahatindanghon do: Sididion do nang posoposo; ala marhitehite sian i do pinasahat nasida tu punguan ni angka na hinophop ni Kristus, mardomu huhut tu panjangkon ni Tuhan Jesus di angka dakdanak.30

Ndang pola sai ingkon usophononhon tu aek molo mandidihon.31

B. Parpadanan na Badia

Tahaporseai jala tahatindanghon do:

Ia Parpadanan Na badia, i ma: Mangan roti parhitean ni Daging ni Tuhanta Jesus Kristus dohot minum anggur parhitean ni mudar ni Tuhanta Jesus Kristus, asa sahat tu hita hasesaan ni dosa, hangoluan dohot hasonangan.32

Marhitehite poda on taalo jala tatulak do poda na mandok: Holan roti i do lehonon tu ruas ni Huria, ndang dohot anggur. Ai songon on do hata ni Tuhan Jesus di na umpajokhon Parpadanan Nabadia i Ibana: "Sude hamu manginum sian i". Laos i do diihuthon Huria na parjolo i.33.

Ndang marojahan di Hata ni Debata ulaon Missa (i ma na mandok: Ganup hali dipelehon Tuhanta i di bagasan Missa i). Dibahen i tung tatulak do i.

Pasal 11: Aturan ni Huria

Tahatindanghon do:

Ingkon adong do aturan ni Huria na marojahan tu Hata ni Debata. Ai sada ulaula do i parentahon dohot pasonanghon Huria.34. Laos songon i pestahononhon do angka Pesta Parhuriaon, i ma Pesta Hatutubu, Hamamate, Haheheon, Hananaek ni Tuhan Jesus dohot Pesta Haroro ni Tondi Parbadia. Alai ingkon tangkas ingoton: Ndada marhite sian haburjuon mangaradoti saluhutna i umbahen na taruli hita di bagasan dosa.

Pasal 12: Taringot tu Panggomgomi

Tahatindanghon do:

Na ro sian Debata do Panggomgomi na marsahala; i ma panggomgomi na mangalo hajahaton, na mangulahon hatigoran na manumpak asa marsonangsonang jala so hariboriboan angka na porsea, hombar tu na tarsurat di Rom 13 dohot 1 Timoteus 2:2.

Alai siingoton do huhut na tarsurat di Ul. 5:29: "Ingkon oloan do iba di Debata asa di jolma".

Marhitehite poda on tahatindanghon do: Sitangianghonon ni Huria do Panggomgomion asa mardalan di hatigoran. Alai patubegehon ni Huria do saorana tu Panggomgomi.

Marhitehite poda on taalo jala tatulak do: Pingkiran na mandok asa "Negara-Keagamaan do Negara"; ai: Negara tinggal negara jala Huria tinggal Huria.35

Molo ringkot di Paruhuman, ala ni na mangalului hasintongan ni uhum, boi do halak Kristen maruari. Songon i do nang na manjalo tohonan dohot pangkat.

Pasal 13: Ari Minggu

Tahaporseai do ari Minggu:

"Ari ni Tuhan i" (ari parmulaan ni panompaon ni Debata), ari Haheheon ni Tuhan Jesus dohot ari Hasasaor ni Tondi Parbadia, na pinestahon ni halak Kristen sian mula ni Huria i. Ndang mulak be hita tu Sabbat ni Jahudi: ai halak Kristen do hita.

Marhitehite poda on taalo jala tatulak do poda ni par-Sabbatis na mandok ari Sabtu do Sabbath Siparbadiaan.

Pasal 14: Taringot tu Sipanganon

Tahaporseai jala tahatindanghon do:

Denggan do sude nasa na tinompa ni Debata jala ndang sisubanghononhon nasa na jinalo mardongan roha mauliate, ai na gabe badia do i binahen ni Hata ni Debata dohot tangiang.

Ndang gabe badia jolma hinorhon ni na mangaradoti angka subangsubang taringot tu sipanganon. Ai haporseaon do manjalo habadiaon sian Debata. Ndang gabe badia jolma hinorhon ni na mangaradoti taringot tu sipanganon. I do alana umbahen dialo Apostel Paulus angka patik-patik ni Jahudi taringot tu sipanganon. Ndang jadi parpudi Barita Nauli bahenon ni angka subangsubang, bahenon ni angka Hadis manang Tradisi.36

Marhitehite poda on, taalo jala tatulak do poda ni parpoda na mamodahon songon i.

Pasal 15: Harposeaon dohot Ulaon na Denggan

Tahaporseai jala tahatindanghon do:

Ingkon parbue ni haporseaon do ulaon na denggan i. Na lilu do halak molo dihirim dapotan hatigoran, hangoluan, apulapul dohot hasonangan ibana moo diula ulaon na denggan. Holan Tuhan Jesus do na boi manesa dosa dohot padomuhon jolma tu Debata.

Siradotan do: Patik na 10 i. Alai marhite haporseaon do mangolu jolma, ndada sian na mangulahon na denggan sambing. Tondi Parbadia do mangonjar jolma mangulahon ulaon na denggan. (Ia so Tondi i na mangonjar, gabe dosa do ulaon na denggan i).37

Pasal 16: Parningotan di Na Monding

Tahaporseai jala tahatindanghon do:

Ampe do tu jolma: Mate sahali, dung i uhum i.38 Na maradian nama ibana sian ulaonna. Pangk. 14:13. Jala Jesus Kristus do Tuhan ni na mangolu dohot na mate. Asa ia tabahen pe parningotan di angka na monding, na marningot ajalta sandiri do hita disi dohot pahothon panghirimonta di hadodomu ni angka na porsea tu Debata dohot pahothon rohanta do i di ngolu parungkilon on.39

Marhite poda on taalo jala tatulak do: Poda Hasipelebeguon na mandok: Adong do pardomuan ni tondi ni naung mate dohot jolma na mangolu. Songon i poda na mandok: Laos tinggal di tanoman i do tondi m na mate i. Laos songon i taalo jala tatulak do poda ni Rom Katholik na mamodahon: Api pangurason (Api parpitapita) na ingkon boluson mangurasi tondi ni naung mate asa tu hangoluan, jala na boi patupaon Misa di na mate, dohot na manangianghon naung mate i asa humatop malua sian api pangurason.

Laos songon i na martangiang tu tondi ni na badia naung mate dohot na manghirim taripar hagogoon dohot habadiaon ni angka naung mate-tanomanna-ulaonna-barangbarangna-holiholina (parmanomanoan), reliqui.

Pasal 17: Taringot tu Surusuruan

Tahaporseai jala tahatindanghon do:

Ia angka surusuruan: Na tinompa ni Debata do i, i ma pangoloi di Ibana, jala tondi parhobas, angka na sinuru, mangurupi angka sitean haluaon i.41

Pasal 18: Ari Uhum Sogot

Tahaporseai jala tahatindanghon do:

Na ro do Tuhan Jesus Kristus di ari parpudi laho manungguli angka na mate.42 Manguhumi nasa jolma.43

Disi ma jouonna angka na porsea laho manean hangoluan salelenglelengna.44 Alai angka na so porsea laho ma nasida tu na bernit salelenglelengna.45

Hot ma tohap ni na porsea i di lambung ni Debata ro di salelenglelengna.

Marhite poda on taalo jala tatulak do poda na mandok:

  1. Na boi do etongetongon ni jolma haroro ni Kristus paduahalihon
  2. Poda na mandok: Na adong dope parasian dung mate jolma i.

Sandok taondolhon: Na so panagaman do haroroNa. 46

Asa tongtong hobas hita songon na pinasingothonna i.47

Referensi

  • https://roimansonpanjaitan.blogspot.com/2013/03/the-confession-of-faith-pengakuan-iman.html

  1. 31 Mei 1934 ↩

  2. Dr. H.M. Bolkestein alaman 203 baris 24 sian ginjang ↩

  3. 2 Korintus 4:13 ↩

  4. 1 Petrus 3:15. 1 Timoteus 4:6: "Anggo i dipodahon ho tu angka dongan, gabe tutu ma ho parhalado ni Kristus, manghangoluhon hata haporseaon i dohot poda na uli na niihuthonmi". ↩

  5. Johannes 4:2:4 ↩

  6. Epesus 4:5, Johannes 17:21 ↩

  7. 5 Musa 6:7 ↩

  8. 2 Korintus 1:21-22. 2 Timoteus 3:16-17 ↩

  9. Mateus 16:16 ↩

  10. 5 Musa 6:4; 2 Musa 3:14a; Gen. 17:1; Psalmen 105:8; 1 Korintus 1:9; 2 Tesalonik 3:3; Lukas 1:37; Rom 11:33; 5 Musa 10:17; Rom 2:11; 1 Korintus 1:30; Psalmen 103:8; Psalmen 24:1; Jes. 3:16; 1 Timoteus 6:15-16. ↩

  11. ida: Johannes 5:19; Johannes 14:11; Johannes 1:1; Johannes 15:26; 2 Korintus 13:13; Mat. 28: 19 ↩

  12. Johannes 15:26 ↩

  13. Mat. 28:18; Ep. 1: 20-22; Ep. 1:7; Johannes 3:16; Heb. 9: 14; Pilippi 2:9-11. ↩

  14. Math. 23:8-10. ↩

  15. Rom 8:14-17; 1 Korintus 3:16 (patudos lapatan ni Haporseaon patoluhon). ↩

  16. 2 Petrus 1:21 ↩

  17. Pangungkapon 22:18-19 ↩

  18. Poda Salomo 3:5; Psalmen 111:10 ↩

  19. Johannes 8:44; 1 Musa 3:1-7; Pangungkapon. 20:10 ↩

  20. 1 Johannes 3:4; Jakobus 1:15 ↩

  21. Psalmen 51:7; 58:4; 1 Musa 8:21; Rom 5:12, 3:12, 23; Titus 3:5; Yohanes 3:5; Johannes 6:63 ↩

  22. Johannes 3:16; 2 Korintus 8:9; Ulaon ni Apostel 4:12. ↩

  23. 1 Korintus 1:2; 1 Petrus 2:9; Efesus 1:2:22; 1 Korintus 3 ↩

  24. 1 Petrus 2:9; Efesus 2:22; Pangungkapon 1:6; Efesus 3:21; 1 Korintus 3:16 ↩

  25. Pangungkapon 7:9 ↩

  26. Johannes 17:20-21 ↩

  27. 1 Korintus 12:28 ↩

  28. Ep. 4:11 dohot Diacon (Ulaon ni Apostel 6). ↩

  29. Mateus 28:19; Markus 16:15-16; Mateus 26; Markus 14; Lukas 22; 2 Korintus 11 ↩

  30. Markus 10:14; Lukas 18:16 ↩

  31. Ulaon ni Apostel 2:41:10, 48:16, 33; Rom 6:4; 1 Korintus 10:4; Titus 3:5; Heber 11:29; 1 Petrus 3:21 ↩

  32. 1 Korintus 11:17-34; Mateus 26; Markus 14; Lukas 22 ↩

  33. 1 Korintus 11:24-25 ↩

  34. 1 Korintus 14:33 ↩

  35. Mateus 22:21b ↩

  36. Mateus 15: Rom 14; Kolose 2; Ulaon ni Apostel 15; 1 Timotius 4:4-5 ↩

  37. Johannes 5:15-16; Efesus 2:8; Rom 5:1 ↩

  38. Heber 9:27 ↩

  39. Pangungkapon 14:53 ↩

  40. Pangungkapon 7:9-17 ↩

  41. Heber 1:14 ↩

  42. Johannes 5:28; 1 Tesalonik 4:16; Mateus 24:3; Lukas 21:28; Pangungkapon 20:1 1-15 ↩

  43. Mateus 25; 1 Korintus 15:52; 2 Korintus 5:10 ↩

  44. Mateus 25:34 ↩

  45. Mateus 25 ↩

  46. 1 Tesalonik 5:2; Mateus 24:42; 44:50; Lukas 12:35-36 ↩

  47. Lukas 12:35-36 ↩

  48. 2 Timotius 3:16-17 ↩